ILOILO – Nagapati ang isa ka regular blood donor nga tuman ka importante ang pagdonar sang dugo ilabi na kon ‘malaka’ ini nga klase ukon type AB.
Sa interview sang Bombo Radyo kay Limar Amar, regular donor sang Dugong Bombo kag isa man ka senior agriculturist sang Poultry and Livestock Section sang Passi City Agriculture Office, iya ginpahayag nga halin 2012, nangin tradisyon na niya ang pagpasakop sa bloodletting activity sang Bombo Radyo.
Suno kay Amar, wala na siya nagaduha-duha sa pagdonar kag bug-os tagipusuon niya ini nga ginahimo bangud nagapati siya nga sa tion nga nagahatag siya sang dugo, daku nga bahin ang iya mabulig sa iban nga tawo.
Iya ini ginkabig nga pag-‘change oil’ kaupod na ang iya pamilya.
Dugang ni Amar, sang 2014, nalipay siya bangud kaupod niya ang iya mga anak sa pagdonar sang dugo.
Iya ginpahayag nga nagahanda man siya subong sa palaabuton nga bloodletting activity paagi sa pagpahuway sang maayo, pagkaon sang utan, kag paglikaw sa mga makahulubog nga ilimnon.
Plano ni Amar nga magdonar sang dugo sa Roxas, Capiz sa subong nga tuig.
Nahibaluan nga sa Iloilo, hiwaton ang Dugong Bombo 2019 sa Iloilo Science and Technology University (ISAT-U) sa Burgos St., La Paz, Iloilo.
