ILOILO CITY – Nakahanda na ang pasilidad sang Iloilo Science and Technology University (ISAT-U) sa pagahiwaton nga Dugong Bombo 2019 bwas, Nobyembre 16.
Sa interview sang Bombo Radyo kay Dr. Raul Muyong, university president sang ISAT-U, iya ginpahayag nga kabahin sang pwede magamit bwas amo ang University Gymnasium kag ang Board Room.
Dugang pa ni Muyong, all-set naman ang mga personnel nga magabulig sa bloodletting activity.
Ginakalipay gid sang ila unibersidad suno kay Muyong nga mangin kabahin sang daku nga proyekto sang Bombo Radyo ilabi na ang Dugong Bombo bangud nagapati siya nga paagi diri, ‘madamo sang kabuhi’ ang literal nga masugpunan kag mabuligan.
Nahibaluan nga ang Bombo Medico ang ginpatigayon man sa amo nga unibersidad subong nga tuig.
MGA DAPAT TANDAAN.
Samtang, liwat man nga ginpahanumdom sang Philippine Red Cross (PRC) ang mga interesado nga blood donors nga magakadto bwas sa Dugong Bombo 2019 nga magpahuway gid sang maayo.
Sa interview sang Bombo Radyo kay Romarie C. Sanchez, R.N., donor recruitment officer sang PRC, iya ginpahayag nga dapat ini tumanon agud mangin isa ka ‘successful blood donor.
Dugang niya, dapat nga may yara sang anom tubtob walo ka oras nga tulog, nakainom sang madamo nga tubig, wala nakainom sang makahulubog nga ilimnon, wala sang hilanat, ubo, ukon sip-on, kag nakalikaw gid sa mantikaon nga mga pagkaon.
Ginpasalig man ni Sanchez nga handa na ang PRC agud tungdan ang obligasyon sa nasambit nnga bloodletting activity.
