ILOILO CITY – Patigayunon ang total rehabilitation sa drainage sang Iloilo Terminal Market kag Iloilo Central Market sa una nga quarter sa masunod nga tuig.
Ini ang ginpasalig ni Local Economic Enterprise Office (LEEO) Head Ariel Castañeda.
Sa interview sang Bombo Radyo kay Castañeda, iya ginpahayag nga may yara na sang budget para sa duha ka merkado: P11 million sa Iloilo Terminal Market kag P5 million para sa Iloilo Central Market.
Suno kay Castañeda, nakapatigayon na sang inspection ang City Engineers Office (CEO) kag sa iya impormasyon, malapit na lang nga matapos ang program of works sa amo nga mga proyekto.
Dugang ni Castañeda, dala man sa kay-uhon sa nasambit nga mga merkado amo ang mga atop.
Iya ginpahayag nga ini ang ginapadasig ni Iloilo City Mayor Jerry Treñas kag isa ini sa ginakabig “urgent” sang alkalde, kag indi na kinahanglan pa nga hulaton pa ang pagtukod sang Private-Partner Partnership (PPP) agud nga makay-o na ang mga ini.
Ang alkalde mismo suno kay Castañeda ang personal nga nagabisita sa mga merkado agud makit-an pa ang dapat pauswagon kag kay-uhon.
