ILOILO – Magahatag sang bulig ang League of Municipalities of the Philippines (LMP) Iloilo Chapter sa mga biktima sang asud-asud nga linog sa Mindanao.
Sa interview sang Bombo Radyo kay LMP President kag San Enrique Mayor Trixie Fernandez, iya ginpahayag nga ini ang naistoryahan na paagi sa pagsinapol nga gin-engganyo man ni Iloilo Provincial Governor Arthur Defensor Jr.
Suno kay Fernandez, mas maayo kon ang ihatag nga bulig ang ipaagi sa cash ukon cash check bagud bastante na sa ‘goods‘ nga donation ang probinsya.
Dugang sang natungdan, ginahingyo man ang mga pribado nga sektor nga maghatag sang bulig sa mga biktima.
Wala sang natalana nga deadline suno kay Fernadez apang ginalauman nga makatipon na ang mga banwa sang fund sa katapusan nga semana sang Nobyembre.
Iya ginpahayag nga ini ang ginahingyo sa mga kabanwahanan agud nga sa tion nga ang probinsya naman ang may emerhensiya, indi ini mabudlayan sa pagpangayo sang bulig sa iban.
Ang pamunuan sang LMP ang magapakig-angot man sa Provincial Disaster Risk Reduction Mangement Council (PDRRMC) agud matigayon nga mapadala sa Mindanao ang matipon sini nga bulig.
