ILOILO – Nagapadayon ang imbestigasyon sang La Paz Police Station kaangot sa kaso sang gina-alegar pag-‘abduct’ sa 13 anyos nga dalagita sa Jereos Extension, La Paz, Iloilo City.
Sa interview sang Bombo Radyo kay Police Chief Master Sergeant Jervin Servano, chief investigator sang La Paz Police Station, iya ginpahayag nga sila ang nag-conduct sang inspection sa lugar kon diin natabo ang insidente agud makakuha sang closed-circuit television copy.
Base naman sa panaysayon sang mga by-standers sa lugar, wala sang plate number ang salakyan sang suspetsado kag ini ang ‘nagharurot’ pakadto sa Gustilo, La Paz sang nagpalagyo.
Ginapanawagan man ni Servano ang witness nga amo ang nagbulig sa dalagita nga magpakig-angot sa ila pamunuan agud makabulig pa solbar sa kaso.
Handa ang otoridad suno kay Servano sa pagbulig sa amo nga witness, bangud base sa ila impormasyon, nagtapungulay pa ini kag ang suspetsado.
Nahibaluan nga natabo ang insidente sang Lunes, sang halin ang dalagita sa eskwelahan kag isahanon lang nga nagpauli kag ginpahayag ginpundohan sang puti nga van kag ginbutong sang lalaki nga nakasuksok sang mask kag itom nga jacket.
