ILOILO CITY- Nagpanugyan ang mga animal rights group sa publiko nga mag-adoptar sang layaw nga ido agud indi pagdakpon kag ipaidalom sa euthanasia ukon mercy killing ang mga ini.
Ini ang kasunod man sang pagdamo sang mga layaw nga ido sa syudad sang Iloilo nga nagatuga sang daku nga kahangawa sa publiko bangud sa dala sini nga rabies.
Sa interview sang Bombo Radyo kay Simon Catague, isa ka seafarer kag founder sang Marine’s Bully Kennel, iya ginpahayag nga madamo sang pamaagi agud malikawan ang mercy killing sa mga layaw nga ido.
Ini amo ang TNVR nga nagakahulugan: Trap ukon pagdakop sang layaw nga ido, Neuter ukon surgical removal sang mga reproductive organ agud indi na ang mga ini magbata, Vaccine ukon pagbakuna sang anti-rabies, kag Return ukon liwat nga pagbuya sang mga ido sa ila teritoryo ukon habitat.
Suno kay Catague, pinaagi sini, malikawan ang halit nga matuga sang mga ido.
Nagapati man si Catague nga posible kulang ang pondo sang gobyerno agud magdakop sang mga layaw nga ido kag magsagod.
May mga grupo suno kay Catague nga mga naga-adoptar sang ido kaangay sang Animal Welfare Association kag nagasagod.
Nagapa adoptar man ang mga ini sang ido sa mga pet lovers nga luyag magsagod sang layaw nga ido.
Magluwas sini, nagpanugyan man ang natungdan sa mga pet lovers nga magdonar sa Animal Welfare Association ukon sa iban pa nga grupo nga nagasagod sang ido agud indi ang mga ini pagdakpon kag ipaidalom sa mercy killing.
Matandaan nga ginbawi na sang Iloilo City Government ang una nga plano nga ipaidalom sa mercy killing ang mga layaw nga ido sa dalanon.
