ILOILO – Nagapangita ang Iloilo Provincial Government sang potensyal nga lugar sa kabukiran agud nga indi mapatam-an sang buho ang mga suba sa mga ginapatigayon nga quarry operations.
Ini matapos nga ginaantisipar sang mga opisyal ang dalagku pa nga demand sa quarrying, humalin sa gamay nga mga negosyo tubtob sa dalagku nga mga construction projects.
Sa interview sang Bombo Radyo kay Iloilo Governor Arthur Defensor Jr., iya ginpahayag nga madamo pa ang proyekto sa probinsya lakip na ang Jalaur Dam.
Kaangot diri, suno kay Defensor, may ara sang data nga ginabasehan ang Provincial Environment and Natural Resources (PENRO) agud mahibaluan kon diin pwede kag indi pwede mapatigayon ang quarry operations.
Dugang sang gobernador, kun siya ang pamangkuton, indi niya luyag nga may ‘extractive‘ nga paggamit sa ‘natural environment‘, apang ini ang ginakinahanglan man sa mga proyekto nga kinahanglan sang mga pumuluyo, ilabi na sa barangay roads.
Dapat lang suno kay Defensor nga dumalahan sang maayo kag rasonable ang mga operasyon.
Kaangot diri, ginpasalig man ni Defensor nga ginasunod sang probinsya ang pag-isyu sang permit kaangot sa mga lugar kon diin pwede kag ginadumilian ang operasyon.
