ILOILO – Dapat balikan sang mga kabanwahan sa probinsya sang Iloilo ang mga ordinansa nga ginapatuman kaangot sa problema sa layaw nga mga ido.
Ini ang pahayag ni Iloilo Governor Arthur Defensor Jr.
Sa interview sang Bombo Radyo kay Defensor, iya ginpahayag nga ang isyu ang masami nga nagabalik-balik lang, kag apisar wala pa sang rekord nga napalab-ot sa ila pamunuan, importante nga bisitahon sang mga lokal nga opisyal kun ano ang mga existing programs sa ila lugar.
Suno kay Defensor, ini ang kabahin sang mga preventive measures nga mahimo sang mga Local Government Unit (LGU) bag-o pa man magluntad ang amo nga kaso nga subong mainit nga ginapangatubang sang syudad sang Iloilo.
Nahibaluan nga sa syudad sang Iloilo, may plano na ang City Veterinary Office nga himuon nga mandatory ang pag rehistro sa mga hinuptanan nga ido sang mga pumuluyo bilang win-win solution na lamang bangud madamo sang mga nagpakamalaut sa euthanasia nga kuntani ipatuman.
