ILOILO – Nangin negatibo sa rabies ang ginpa-eksamin nga ulo sang ido nga ginpahayag ‘nagbaris kag nag-buang’ sa Bo. Obrero, Lapuz, Iloilo City.
Ini ang resulta matapos gin-ayo sang City Veterinary Office sa pamilya kag tag-iya sang ido nga utdon ang ulo sini kag ipadala sa laboratory agud mahibaluan kon rabied ini.
Sa interview sang Bombo Radyo kay City Veterinary Officer Dr. Tomas Forteza, iya ginpahayag nga wala sang rabies ang azkal nga ido nga si Brownie, kag nangagat lamang ang ido bangud indi ini familiar sang nagkuha sa iya nga amo ang 18 anyos nga anak sang panday sang pamilya.
Nahibaluan nga nakaangkon sang duha ka pilas sa kamot kag isa sa tiil ang biktima.
‘OBRA KO, OBRA MO’
Samtang, bilog naman nga komunidad ang kinahanglan agud mabuligan tapna ang problema sa layaw nga ido.
Ini ang indi mahimo sang Iloilo City Government kun wala ang kooperasyon sang publiko.
Suno kay Mayor Jerry Trenas, ini ang kaangay man sa pagtapna sang iligal nga droga sa kada barangay sa diin nagabuligay ang mga opisyal kag may yara sang BADAC ukon Barangay Anti-Drug Abuse Council.
Dugang ni Trenas, indi lang kuntani pag-isalig sa ila ang obligasyon kundi dapat ini buligan sang tanan.
Nagpasalig man ang alkalde nga magasapol siya sa City Veterinary Office kag sa mga punong barangay kaaangot diri.
Dugang pa ni Trenas, ginalantaw nga posibilidad ang Calajunan sa Mandurriao sa diin posible mapahamtang ang city dog pound.
