ILOILO – Nagaguwa nga wala na sang plano nga magbayad ang Panay Electric Company (PECO) sang ila nga real property tax sa Iloilo City Government.
Sa interview sang Bombo Radyo kay Atty. Edgar Gil, Iloilo City legal officer, iya ginpahayag nga ginabawi-bawi sang PECO ang ila statement kag wala sini ginasunod kun ano ang nahambalan sa una nga mga negosasyon.
Suno kay Gil, napa-intindi na sa PECO ang ila nga balayran.
Makapila na ka beses suno kay Gil nga nagpungko kag nagpatigayon sang negosasyon kaupod ang amo nga power company.
Nahibaluan nga sa una nga negosasyon, nakasugtanan sang Panay Electric Company kag sang syudad nga bayaran ang 134 million nga real property tax — nga ginalakipan sang 59 million pesos nga principal payment kag 75 million pesos nga second and third assesment and computations sa ila mga properties, mga poste, kag mga linya sang kuryente.
Nagkasugot ang duha matapos nga nag-‘huo’ ang PECO apang pila ka adlaw matapos ang negosasyon, ginbawi sang nasambit nga pamunuan ang ila nga ‘huo’ kag nagpahayag nga nagapangindi na sila sa negosasyon.
Sa ikaduha nga negosasyon, amo gihapon nga bili ang ginkasugtan kaupod ang abogado sang PECO, City Assesors Office kag City Engineers Office agud nga ma-athag sa ila ang breakdown amount sang 134 million pesos nga ginasukot sa ila sang syuad.
Liwat nga nagkomitar ang PECO suno kay Gil, apang isa ka oras ang nagligad, liwat naman nga nag-atras.
Sa subong, ginpahayag ni Gil, nga posible magaabot ang Disyembre 12 nga pagbaklon na sang More Electric Company ang ila propiyedad.
Apisar sini, gin-athag ni Gil nga sa tion sa mapatigayon na ang auction ang propiyedad sang PECO, santu sa layi, mahimu pa nila nga ma-excercise ang ila nga ‘rights to first refusal’ sa diin may ara sila isa ka tuig nga ma-redeem ang mga ini paagi sa pagbakal sini sa balor nga ginbid sang nagbakal nga kompaniya.
