ILOILO – Wala nagakatulog ang mga opisyal sang Local Government Unit (LGU) sa banwa sang Ajuy, Iloilo sa tion nga may mga problema nga nagakatabo ilabi na sa mga kabataan.
Suno kay Sangguniang Bayan Member Angel Briones, ini ang napamatud-an sang pag-resign sang highschool teacher sa Pili National High School bangud sa natukiban nga pagpalantaw sini sang ‘pornograpic films’ sa mga grade 10 students.
Dugang ni Briones, ini ang nagapahayag lamang nga ginahatagan gid sang pagtamod sang Department of Education kag media ang ‘values and morality’ sang mga kabataan.
Ginkasubo man ni Briones ang gilayon nga paghalin sang high school teacher sa pwesto, bangud suno sa iya, mas maayo kuntani kun nag atubangay ini kag ang LGU agud napamatian man ang iya bahin.
Gin-athag man ni Briones nga wala ni makaisa nga gin-siling niya nga magresign ini.
Ini tungod wala man siya sang personal nga hilikutanon kaangot sa manunudlo.
Sa pihak nga bahin, pahayag ni briones, nalipay man siya bangud ginhatagan sang atensyon ang ginapangabudlayan sang mga lokal nga opisyal.
