ILOILO – Gindeklara nga patay subong nga aga ang isa ka fire officer matapos nga naaksidente sa motorsiklo sa Brgy. Alibayog, Sara, Iloilo ‘las 5:50 kahapon, Nobyembre 28.
Ang biktima ang ginkilala nga si FO3 Rommel Baclagon, 55 anyos sang Osmeña St. Arevalo, Iloilo, temporaryo nga nagatinir sa San Dionisio, Iloilo kag na-assign sa Lemery Fire Station.
Sa interview sang Bombo Radyo kay Pol Corporal Klim Delgado, PNCO traffic investigator sang Sara Municipal Police Station, iya ginpahayag nga napatay ang biktima takna 3:48 subong nga aga sa Iloilo Doctors Hospital.
Ini ang ginkumpirma man sang asawa sang biktima.
Sa una nga interview sang Bombo Radyo kay Delgado kagab-i, unconscious sang ginpadangat sa hospital si Baclagon.
Nahibaluan nga ‘blind curve’ ang dalan sa Brgy. Alibayog, Sara sa diin natabo ang aksidente.
Suno kay Delgado, nabungguan ni Baclagon ang ginasundan niya nga motorsiklo bangud posible nga wala niya natalupangdan.
Dugang ni Delgado, nakaangkon sang patal nga pilas sa ulo ang biktima matapos nga naglampos gid ini sa semento nga dalan.
Nahibaluan nga may yara siya sang helmet nga dala apang wala niya ini nasuksok.
