ILOILO CITY – Padayon pa nga nagapangita ang kapulisan sang dugang nga kopya sang Closed Circuit Television (CCTV) agud makilala na ang duha ka suspek nga nagtiro-patay sa isa ka collector sa Mohon Terminal, Arevalo, Iloilo City kagab-i.
Ini bangud buron kag ‘subject to enhancement’ pa ang CCTV copy nga yara subong sa Arevalo Police Station.
Sa interview sang Bombo Radyo kay PLT Feleciano Sedotes, deputy commander sang Arevalo Police Station, iya ginpahayag nga nagalibot pa ang intelligence operatives sa lugar agud makakita sang dugang nga ebidensya kaangot sa krimen nga ginkamatay ni Earl John Agudo, residente sang Villa, Arevalo.
Suno kay Sedotes, padayon man ang pagpangita sang dugang nga witnesses sa insidente.
Ini apisar nga base sa nagapadayon nga imbestigasyon, nahibaluan nga padulong sa banwa sang Oton ang direksyon sang duha ka lalaki nga naga-angkas sa motor.
Pahayag pa ni Sedotes, suno sa mga nakasaksi, naga-agi agi na sa Mohon Terminal kag nagatambay ang duha ka lalaki bag-o magluntad ang pagluthang.
Kaagot naman sa posible rason sang pagpaniro, ginpahayag ni Sedotes nga ila ginalantaw ang anggulo sang away sa trabaho bangud suno sa himata sang biktima, may nakaaway pa ang biktima sang damlag lang.
Paga-imbestigahan man kun bala may kaangtanan sa iligal nga droga ang kaso, apang gin-athag sang otoridad nga wala sang blotter entry nga narekord batok sa biktima.
Nahibaluan nga dead on the spot si Agudo matapos nakaangkon sang apat ka gunshot wounds sa iya ulo.
Ginpatihan nga 9mm ang gingamit sang suspek sa pagtiro sa biktima.
