ILOILO – Dapat nga tupong kag wala sang ginapasulabi ang pag-implementar sang mga programa kag proyekto sa probinsya sang Iloilo.
Ini ang ginpahayag ni Iloilo Governor Arthur Defensor Jr. matapos nga sa session sang Sangguniang Panlalawigan subong nga semana, nagtaas ang tingog ni 4th District Iloilo Board Member Dominggo Oso Jr. bangud sa iya pagpati nga gamay lang ang nahatag nga jetmatic pumps ukon bomba sang tubig sang Iloilo Provincial Government sa iya nasakupan nga distrito.
Ginpaguwa ni Board Member Oso ang iya hibubun-ot bangud para sa iya, pamulitika ang natabo sa indi patas nga pagpanghatag sang jetmatic pumps.
Sa data sang Provincial Engineers Office, ang mga nakabaton sang jetmatic pumps sa probinsya amo ang mga masunod;
Sa 1st District sang Iloilo:
Igbaras – 10
Miag-ao – 41
San Joaquin – 20
Tubungan – 30
Sa 2nd District sang Iloilo:
Alimodian – 31
Leganes – 30
New Lucena – 20
San Miguel – 6
Sa 3rd District sang Iloilo:
Badiangan – 33
Bingawan – 15
Cabatuan – 30
Calinog – 45
Lambunao – 46
Pototan – 61
Maasin – 33 (pending kag wala pa mahatag sang probinsya bangud sa kapaslawan nga kumpletuhon ang mga requirements)
Sa 4th District sang Iloilo:
Dingle – 15
Dumangas – 41
Sa 5th District sang Iloilo:
San Dionisio – 20
Carles – 30 kag;
Estancia – 30
Sa interview sang Bombo Radyo kay Defensor, iya gin-athag nga ginpanagtag ang nasambit nga mga jetmatic pumps sang 2016 kadungan sang pagdeklara sa probinsya sang state of calamity bangud sa El Niño.
Ginpasulabi suno kay Defensor ang mga lugar nga gindeklara apektado sang kalamidad.
Bangud sang madamo nga naga-oponer sa amo nga proyekto kag wala na sang El Niño subong, gin-untat na ang pagpanagtag sini apang suno kay Defensor, may yara gihapon sang programa sa water system sa probinsya.
Ginpahayag sang gobernador nga indi lamang sa jetmatic pumps naga-aplikar ang ‘equitable implementation’ kundi sa tanan nga programa sang probinsya.
Suno kay Defensor, wala gid sa iya personal nga interes nga pasulabihon ang isa ka banwa batok sa isa.
Dugang pa sang gobernador, may ginahimo man nga pag-review agud nga makit-an ang mga sala kag sarang matadlong sa sunod nga pag-implementar sang lain na naman nga programa.
