ILOILO CITY – Paghimakas kag ang pagsalig sa Ginuo ang nangin salandigan sang isa ka anay Overseas Filipino Worker nga iloy agud nga mahatagan sang maayo nga kabuhi ang iya pamilya.
Sa Good Morning Philippines program, ginpahayag ni Monina Arellano sang Badiangan, Iloilo nga 18 anyos pa lang siya sadto sang umpisa sa pagtrabaho sa Hong Kong.
Suno kay Arellano, iya nga ginsakripisyo ang pagtuon sa kolehiyo agud nga makabulig sa iya pamilya apang ang iya kabuhi sa luwas sang pungsod ang wala nangin mahapos.
Ginpahayag ni Arellano nga isa sa pagpanghangkat amo ang pagbatyag niya sang homesickness apang ang iya pagsakripisyo ang nabayluhan
sang kasadya.
Sa Hong Kong niya nakilala kag ginpakaslan ang iya nangin bana nga isa ka seaman nga tumandok sang Maasin, Iloilo.
Bangud sa pila ka sirkumstanya, nagpauli sila sa pungsod kag liwat nga nagpakasal tubtub nga naka-angkon sang anak kag amat-amat nga nakapondar.
Kun sadto suno sa natungdan, pigado ang ila nga pagpangabuhi apang paagi sa paghimakas nila nga mag-asawa, nakapondar sila sang pila ka unit sang depampasahero nga jeep, nakabakal sang duta, nakapatukod sang negosyo kag napaeskwela ang tatlo ka kabataan.
Sa pihak sang ‘rags to riches’ nga istorya, ginpahayag ni Arellano nga wala niya nalab-ot ang tanan kun wala siya nagpangabudlay bilang Overseas Filipino Worker sa bulig sang pagpangamuyo.
