Nalakip ang pambato sang Iloilo City nga si Patricia Lynn Beerda sa 36 ka mga beauty queen para sa 2026 batch sang Binibining Pilipinas pageant.
Gin-anunsyo ini sang Binibining Pilipinas Charities Inc. (BPCI) matapos ang final screening nga ginpatigayon sa ginatos nga mga nag-apply.
Sa ginhiwat nga Miss Iloilo 2026, gintiglawas ni Beerda ang distrito sang La Paz kag sang ulihi ginkoronahan ini nga Miss Iloilo Paraw Binibini.
Isa na sa makabig pageant veterans sa Iloilo si Beerda nga may yara sang exposure sa national stage matapos ini nagdaog man anay bilang runner-up sa 2019 Miss Teen Philippines.
Lakip man sa balantayan sa Binibining Pilipinas subong nga tuig amo ang Miss Universe Philippines semifinalists nga sanday Gwendoline Meliz Soriano, Jarina Sandhu, kag Sasha Lacuna.
Nanguna sa screening committee si 2005 Miss International Precious Lara Quigaman nga myembro sang BCPI Executive Committee halin pa sang 2022.
Duha ka titulo ang mahimo makuha sa sini nga pageant nga amo ang Bb. Pilipinas International kag Bb. Pilipinas Globe, kag may yara man sang duha ka runners-up.
Ini na ang ika-62 nga tuig sang Binibining Pilipinas. Sang ini pa ang naga-uyat sang Miss Universe franchise sa Pilipinas, naka-produce ini sang apat ka Filipina Miss Universe winners nga amo sanday Gloria Diaz (1969), Margie Moran (1973), Pia Wurtzbach (2015), kag Catriona Gray (2018)
