ILOILO CITY – Nagpaandam ang otoridad sa publiko nga mahimo mabiktima sang nagalapta nga scam ilabi na subong nga paskwa.
Sa interview sang Bombo Radyo kay Patrolman Emerito Frutas, public information officer sang Cybercrime Unit sang Police Regional Office (PRO) 6, iya ginpahayag nga halos kada adlaw, may yara sang nagadugang nga modus nga ginagamit ang mga suspetsado.
Lakip sa mga ini amo ang text scam, online scam, kag love scam.
Suno kay Frutas, kalabanan sang mga pagpanunto sa text kag sa social media ang nagapangayo sang load ukon cash.
Sa love scam naman suno sa natungdan, may yara sang nagapakilala nga foreigner kag kadam-an sang mga nabiktima amo ang mga tigulang.
Agud makuha ang ginpromisa nga regalo ukon package sang foreigner, kalabanan sang mga biktima ang nagakapilitan nga magbayad sang kwarta sa mga tinawo nga sa ila paglantaw nagikan sa Bureau of Customs (BOC).
Bilang panugyan, ginpahayag ni Frutas nga mas maayo nga sa tion nga magbakal sang mga produkto online, magbayad na lang kun ma-deliver na ini.
Mas maayo man nga mangin alerto suno kay Frutas.
Dugang sang natungdan, padayon pa ang monitoring sang ahensya sa posible bag-o nga estilo sang mga suspetsado.
Ginpahayag man nga santu sa record, wala sang organisado nga grupo sang scammers sa rehiyon kag kalabanan sang mga supetsado ang nagikan sa Region 4A.
