ILOILO CITY – Handa na ang security plan sang Iloilo City Police Office (ICPO) agud nga mapat-od ang seguridad sang mga local and foreign tourists nga ginalauman nga maga-dagsa sa Dinagyang Festivities.
Sa interview sang Bombo Radyo kay Police Lt. Mercylyn Duero, deputy for operations sang ICPO, iya ginpahayag nga may yara nakahanda nga tatlo ka operasyon ang kapulisan kag ini amo ang:
- Pre-Operations — sa diin na sulod ang preparation kag coordination sa iban pa nga mga ahensya, amo man ang pagplano kag security operation sa tagsa ka festivity;
- Operations — ang implementasyon sang mga ginplanuhan; kag
- Post-operations— kun ano pa ang dapat bantayan pagkatapos sang mga aktibidad.
Dugang pa sang opisyal, gintukod man ang Task Force Dinagyang sa diin task group commander si Police Regional Office (PRO) 6 Regional Director Police Brigadier General Rene Pamuspusan.
Napaidalom sa Task Force Dinagyang ang plano nga pag-establisyar sang sub-site task group Dinagyang 2020 nga pamunuan ni ICPO Director Police Col. Martin Defensor Jr.
Kaangot sa pagpanghanda sa Dinagyang, may pila ka mga pagsulundan ang otoridad agud mangin hilway sa katalagman ang tumalan-aw.
Suno kay Duero, patigayunon ang gun ban, buot silingon, gina-bawal ang pagdala, pagsukbit, kag pagdisplay sang armas duha ka adlaw antes ang highlight sang mga aktibidad kag isa ka adlaw pagkatapos sini.
Ginadilian man ang pagdala sang bisan ano kadaku nga backpack, mga taliwis kag matalom nga mga bagay kaangay sang icepick, kutsilyo kag glass water bottles.
Magapatigayon man sang frisking ang kapulisan sa diin indi pagpahunugutan nga makasulod sa activity areas ang bisan sin-o man nga makit-an nga may dala nga kontrabando.
Nahibaluan nga 2,200 nga mga kapulisan sang syudad kag 102 ka mga police auxillaries ang i-deploy para sa Dinagyang Festival 2020.
