ILOILO – Ginapanawagan sang Iloilo Provincial Police Office (IPPO) ang multi-sectoral approach ukon pagbinuligay sang mga sektor agud matapna ang nagataas nga kaso sang suicide sa probinsya sang Iloilo.
Sang 2019, na-record ang 79 ka kaso sang paghikog sa probinsya, mas mataas sang 20% ipaanggid sa 65 ka kaso sang 2018.
Sa interview sang Bombo Radyo kay IPPO Director Pol. Col. Roland Vilela, iya ginpahayag nga indi lang trabaho sang kapulisan ang pagbulig sa mga pumuluyo sa amo nga kaso apang responsibilidad ini sang tanan.
Kaangot diri, iya ginhingyo sa mga eskwelahan, kabaranggayan, media, kag iban pa nga sektor nga ikampanya ang mental health.
Suno sa opisyal, bisan siya ang nagabukas sang iya linya sa mga may problema kag iya pa ginlahog nga mahimo siya tawgan sa iya personal nga numero bangud mahimo man siya nga mangin ‘Dr. Love’ ilabi na sa mga kabataan nga may problema sa paghigugma.
MGA KAMPANYA.
Sa 79 ka kaso sang paghikog sa probinsya, nahibaluan nga nagapanguna ang syudad sang Passi, kag ginasundan sang mga banwa sang Cabatuan, Leon, kag Sta. Barbara.
Kaangot diri, ginpahayag ni Passi City Mayor Stephen Palmares nga mas ginpabaskog pa ang kampanya sangCity Government sa depression kag suicide awareness.
Suno kay Palmares, naumpisahan na ang symposium sa Passi National High School kag Passi City College.
Plano sang opisyal nga himuon na ang school-based ang programa agud mas madamo pa nga mga kabataan ang makadtuan, ilabi na bangud subong nga Enero, isa naman ka 14 anyos nga estudyante ang naghikog sa isa ka barangay sa syudad.
Ginpasalig ni Palmares ang mga pumuluyo nga wala nagapabaya ang syudad sa amo nga problema.
