ILOILO CITY – Balantayan buwas sa gab-i, Enero 11, ang grand performance night sang 12 Finalists sa The 3rd National Bombo Music Festival nga pagahiwaton sa Cultural Center sang West Visayas State University sa La Paz, Iloilo City.
Kapin P1.3 million ang kabilugan nga premyo sa The 3rd National Bombo Music Festival.
Ang Grand Prize (Champion) ang magabaton sang P275,000;
First Runner Up ang magabaton sang P200,000;
Second Runner Up ang magabaton sang P150,000;
Ang nabilin nga siyam ka finalists ang may guaranteed nga P75,000 nga consolation prize ukon may kabug-usan nga P675,000 kag;
Ang Best Interpreter ang magabaton sang P30,000
Ang tanan nga cash prize sa The 3rd National Bombo Music Festival ang gilayon nga ihatag sa mga tagdaug kadungan sa grand performance night nga maga-umpisa 6:00 buwas sa gab-i.
Ang Bombo Music Festival ang isa sa tatlo ka mga mayor nga corporate social responsibility project sang Bombo Radyo Philippines kaupod sang Bombo Medico nga ginahiwat sa kada bulan sang Hulyo para sa pagsabat sa kinahanglanon medical, dental kag optical sang mga pumuluyo nga lubos nga nagakinahanglan kag ang Dugong Bombo sa tagsa ka Nobyembre nga sabat sa panawagan sang boluntaryo nga blood donation kag pagkinahanglan sang dugo.
Subong nga Bombo Music Festival, pagabug-usan sang sampaton nga board of judges nga sanday Maestro Ryan Cayabyab nga kilala nga musician kag National Artist and Magsaysay Awardee in Music; Vehnee Saturno, certified gold record producer and renowned composer; young hit makers and artists nga sanday Bituin Escalante kag Myrus Ramirez lakip na ang Jesuit composer nga si Father Peter Pojol.
Ang nasambit nga pasundayag ang paga-updan sang mga hangkilan kag sampaton nga katapo sang 36-piece Bombo Symphony Orchestra.
Sa interview sang Bombo Radyo kay Maestro Gerardo “Bimbo” Muyuela, musical director sang Bombo Symphony Orchestra, iya ginpahayag nga live orchestra ang magatukar sang musika samtang naga-amba ang 12 ka finalist.
Suno kay Muyuela, kinahanglan nga masaksihan gid sang tanan ang live performance sang 12 ka finalist nga nagapakita sang abilidad sang local kag aspiring composers/singers.
Ginpahayag ni Muyuela nga ini na ang ika-apat niya nga tuig bilang musical director sang Bombo Music Festival rason nga tuman ang iya nga pagpasalamat sa Bombo Radyo Philippines.
