ILOILO CITY – Gindayaw sang matag-as nga opisyal sang Republika sang Pilipinas ang The 3rd National Bombo Music Festival 2020, An Original Song-Writing Competition.
Lakip sa mga nagpalab-ot sang pagdayaw amo sanday Presidente Rodrigo Duterte, Vice President Leni Robredo, Senate President Vicente Sotto III kag House Speaker Alan Peter Cayetano.
Suno kay Presidente Duterte, nangin dako ang papel sang Bombo Radyo Philippines sa pagpasanyog sang kultura pinaagi sa paghatag sang kabilinggan sa Filipino songwriters.
Ginpasalig man ni Presidente Duterte nga mag- upod ang administrasyon sa pagpatuman sang mga programa nga nagapasanyog sang talento sang mga Pilipino.
Ginpangamuyo man sang Presidente ang madinalag-on nga pagpatigayon sang Bombo Music Festival.
Suno naman kay Vice President Robredo, pinaagi sa iya programa nga “Istorya ng Pag-asa”, nahatagan sang kahigayunan ang mga Pilipino nga mapakita
ang ila pinasahi nga talento.
Gani, amo na lang ang pagpasalamat ni Vice President Robredo nga natukod ang Bombo Music Festival sa diin nangin palaagyan ini agud mapasundayag ang ginakabig World-Class Filipino talent.
Nagapati naman ang Bise Presidente nga ang Bombo Music Festival ang indi lang magahatag sang inspirasyon sa mga talented nga musician kundi magahatag
man sang paglaum pinaagi sa music nga isa ka universal language.
Ginpahayag naman ni Senate President Sotto nga dalayawon ang Bombo Radyo Philippines bangud pinaagi sa Bombo Music Festival, mahatagan sang
kahigayunan ang mga Pilipino ilabi na ang kabataan nga mapakita ang ila talento sa pagsulat sang ambahanon.
Ang lihok sang Bombo Radyo Philippines suno kay Sotto ang isa ka maayo nga tikang para sa mga nagahandum nga mangin forefront sa broadcast industry.
Ginpanginbulahan naman ni House Speaker Cayetano ang Bombo Music Festival Committee nga nagpulaw agud mangin madinalag-on ang kahiwatan.
Pinaagi sa Bombo Music Festival suno sa pinuno sang Kamara, mas mapakita pa sang local musicians ang ila talento nga nagapamatuod nga manggaranon ang
Pilipinas kun musika ang pagahambalan.
Nahibaluan nga ang grand performance night sang The 3rd National Bombo Music Festival ang patigayunon karon sa gab-i sa West Visayas State University Cultural Center sa La Paz, Iloilo City.
