ILOILO CITY – Indi mangin madinalag-on ang The 3rd National Bombo Music Festival kun wala ang bug-os nga suporta sang top management sang Bombo Radyo Philippines sa pagpamuno sang chairman sang Florete Group of Companies nga si Dr. Rogelio Florete.
Sa Good Morning Philippines program, ginpahayag ni Mr. Enrico Jacomille, chairman sang exectuive committee sang Bombo Music Festival 2020 nga ang pagpatigayon sang Bombo Music Festival: An Original Songwriting Competition, ang nagakinahanglan sang moral kag logistics support sang network.
Suno kay Jacomille, nagalaum siya nga mapadayon sang network ang pagpatigayon sang Bombo Music Festival agud nga itib-ong ang local talents nga mapaanggid sa world class performers.
Ginpahayag ni Jacomille nga dungog sa iya kun mapili-an liwat bilang chairman sa patigayunon nga Bombo Music Festival 2021 sa pihak sang mga pagpanghangkat.
Sa pagkamatuod suno sa natungdan, bisan si Maestro Ryan Cayabyab nga kilala nga musician kag National Artist and Magsaysay Awardee in Music ang nagdayaw kag nagpabutyag sang interes nga mangin judge sa masunod nga Bombo Music Festival.
Gindayaw man ni Cayabyab ang 36-piece Bombo Symphony Orchestra nga amo ang nagtukar ang musika samtang naga-amba ang mga finalist kag ang Bombo Music Festival lamang ang national competition nga nagagamit sang live orchestra sa grand performance night.
Madamu pa sang bag-uhon may kaangtanan sa pagpatigayon sang Bombo Music Festival sa masunod nga tuig.
Sa palaabuton nga 2021, lauman kay Jacomille nga madamu sang ‘innovations’ nga patigayunon kag dapat ini nga masaksihan sang live.
Ginpahayag man sang natungdan nga indi na bag-o sa tagsa ka aktibidad nga ginapatigayon sang Bombo Radyo Philippines nga may yara gid sang pag leve-up nga matabo santo sa ginalauman sang top management.
Samtang, ginatun-an man sang executive committee nga dugangan ang 12 ka finalist para sa grand performance night sa masunod nga Bombo Music Festival.
Ginpasalig ni Jacomille nga bilang chairman, iya nga sapolon ang tanan nga miyembro sang executive committee agud nga mahibalu-an kun ano pa ang dapat nga bag-uhon.
Kun ano man ang mahisugtan, iya ini nga iplastar sa top management agud nga mapaayo pa gid ang pagdumala sang Bombo Music Festival.
Para naman sa mga aspiring composer/singer nga maluyag nga magpakigbahin sa Bombo Music Festival, may yara sang song writing workshop nga ginapatigayon ang network.
