ILOILO CITY – Kinahanglan nga mapadayon ang pagtib-ong sang Original Pilipino Music bilang tanda sang kultura sang mga Filipino.
Ini ang panugyan sang 12 ka finalist sa The 3rd National Bombo Music Festival sa mga aspiring composer kag singer nga nagaduha-duha nga ipakita ang ila talento sa patag sang musika.
Sa Good Morning Philippines Program, ginpahayag ni Glenn Bawa, composer kag interpreter sang ambahanon nga Sabi Ko Naman Sa’yo, nga sa tagsa ka kompetisyon, may yara gid sang nagadaug kag may yara man sang napaslawan.
Suno kay Bawa, indi importante ang premyo nga makuha kundi ang dungog bilang isa sa mga music contributor sa pungsod.
Ginpahayag ni Bawa nga indi dapat pag-ikahuya ang talento ilabi na kun ini ang para sa kaayuhan.
Para naman sa manunudlo nga si Ramie Capuyan, isa sa mga composer sang ambahanon nga Break, iya gid nga gina-engganyo ang mga estudyante nga pasangkaron ang talento sa pagbalay sang ambahanon.
Suno kay Capuyan, kinahanglan nga mas pasangkaron sang mga ulihing tubo ang ila tagsa ka abilidad agud nga indi madula ang Original Pilipino Music.
Bilang isa sa mga finalist sa Bombo Music Festival, ginpahayag sang natungdan nga bugal para sa iya nga isa ang ambahanon nga Break sa mga ginpili-an sang hangkilan nga music artists sa pungsod.
Samtang, para naman kay Ernie John Colores sang San Pablo City kag Musical Arranger sang ambahanon nga Sabi ko Naman Sa’yo, paagi sa Bombo Music Festival, iya nabinag-binag nga indi lamang ang mga composer kag performer ang may daku nga papel.
Suno kay Colores, indi mangin madinalag-on ang isa ka ambahanon kun wala ang musical arranger nga amo ang nakatuka kun ano ang mangin plastada sang musika.
May kaangtanan naman sa ginpatigayon nga Bombo Music Festival, ginpahayag sang natungdan nga daku ang iya pagpasalamat sa kahigayunan nga iya napakita kun ano man ang iya natun-an sa patag sang musika.
