BATANGAS – Nakabulig ang ulan agud indi na tuman ka tanto ang dulot nga halit sang ashfall ukon abo kasunod sang paglupok sang Taal Volcano sa Batangas.
Sa interview sang Bombo Radyo kay Roman John Mabanes, tumandok sang Miag-ao, Iloilo apang pito na ka tuig nga nagatinir sa Lipa City, Batangas, iya ginpahayag nga bangud sang ulan nga nagbubo kahapon sang udto, nabuhinan ang tuman kadamol nga abo nga nagapunsok sa dalan kag sa mga katamnan.
Ginpahayag man ni Mabanes nga sa subong, nagapabilin gihapon sa ila mga panimalay ang mga pumuluyo kag naga-guwa lang sa tion nga may importante nga baklon kaangay sang pagkaon.
Mabudlay ang mag-ginhawa suno kay Mabanes kag masakit ini sa dughan amo nga nagagamit gid ang tanan sang face masks.
Ginkansela man ang mga trabaho halin sang Domingo sang aga, kag ginalauman nga tubtob bwas ang suspensyon.
Ginbalik-balikan man sang natungdan ang natabo sang Domingo, Enero 12, sa diin ‘las dos sang hapon, nahibaluan nga nag-umpisa na alburuto ang bulkan, apang bangud ginabanta duha ka oras ang byahe sang kalayuon sang Taal Volcano sa nahamtangan sang ila balay, wala man nag-bakwit ang pamilya ni Mabanes kag nagpamati lang sila sang balita.
‘Las 4 na sang nag-umpisa ulan sang abo suno kay Mabanes kag ang mga lugar nga malapit sa bulkan ang natabunan gid sang pino nga balas.
Sa subong, padayon nga ginapaaligmat ang pumuluyo sa lugar bangud may mabatyagan pa nga pagtay-og apang suno kay Mabanes, medyo kalmado na ini ipaanggid sang Domingo.
