ILOILO – Yara na sa summary hearing ang kaso nga gin-file ni Police Major Ronnie Brillo, hepe sang Pototan Municipal Police Station batok kay Patrolman Joerick Ace Ilisan nga nagpahog sa iya sang iya nga gin-akigan sang nagligad nga tuig.
Sa interview sang Bombo Radyo kay Atty Rutchel Espinosa, supervisor sang Legal Section sang National Police Commission (NAPOLCOM) 6 kag summary hearing officer sang nasambit nga kaso, iya ginpahayag nga ginahulat nalang ang position papers sang duha ka partido agud nga makahimo na sang rekomendasyon kag ipasa na sa NAPOLCOM en banc nga amo na ang magahatag sang desisyon.
Nahibaluan nga sang Oktubre 17, 2019, ginpapanaugan sang formal charge nga grave misconduct ang natungdan kag sang Nobyembre 2, nabaton ni Atty. Espinosa ang kaso.
Sang Nobyembre 14, nabaton ni Patrolman Ilisan ang summon, kag sang Disyembre 7, nagsabat ang ginkasuhan nga pulis.
Masunod, sang Enero 6 subong nga tuig, ginpatigayon ang pre-hearing conference.
Pagkatapos sang kinse ka adlaw nga allowance sa mga natungdan nga magpasa sang ila position papers, posible nga may yara na sang rekomendasyon si Atty Espinosa.
Nahibaluan nga sang nagligad nga tuig, nagpahubog sanday Patrolman Joerick Ace Ilisan kag Corporal Esil Peñarubia samtang naga-duty, nagpalupok pa sang armas, kag nagpahog sa ila hepe nga patyon.
Sanday Ilisan kag Peñarubia ang naaktuhan sang mga opisyal sang Police Regional Office (PRO) 6, kag sa amo man nga tion, wala nakasuksuk sang uniporme ang duha.
