ILOILO – Gin-athag sang Iloilo Provincial Legal Office nga sarang ma-amyendar sang Sangguniang Panlalawigan ang Provincial Ordinance 2007-068 ukon An Ordinance Protecting and Promoting Animal Welfare may kaangtanan sa kontrobersyal nga Pasungay Festival sang San Joaquin, Iloilo.
Sa interview sang Bombo Radyo kay Provincial Legal Officer Atty. Dennis Ventilacion, iya ginpahayag nga sa tion nga ma-amyendar sang Sangguniang Panlalawigan ang amo nga ordinansa, ini na ang pagabasehan ni Iloilo Governor Arthur Defensor Jr. kun bala i-implementar ini ukon i-veto.
Apang, pahayag sang natungdan, malawig nga proseso ang pag-amyendar kag kaangay nga daw nagahimo lang sang bag-o nga ordinansa.
Suno pa kay Ventilacion, may mga pagpanikasog na sang una sa diin ginpatigayon ang mga committee hearing agud kuntani ma-amyendar ang ordinansa apang wala man ini nadayon.
Nahibaluan nga una na nga ginpahayag ni Defensor nga wala sang kinamatarong ang local chief executive nga i-suspend ukon i-repeal ang isa ka existing provincial ukon municipal ordinance.
Ini man ang may kaangtanan sa ginahingyo sang Sangguniang Panlalawigan nga i-suspend ang Ordinance Protecting and Promoting Animal Welfare agud madayon na ang Pasungay Festival nga ginakabig nga kabahin sang tradisyon kag kultura sang banwa sang San Joaquin, Iloilo.
