ILOILO CITY – Nagapadayon ang information dissemination nga ginapatigayon sang otoridad sa Sen. Benigno Aquino Avenue Jr. ukon Diversion Road, Mandurriao, Iloilo City kadungan sang ikaduha nga adlaw sang implementasyon sang traffic discipline zone.
May mga naka-deploy nga pulis kag traffic auxiliary agud mabantayan ang mga motorista kag mga pasahero.
Sa interview sang Bombo Radyo kay PSSGT Jeffrey Gallardo sang Traffic Enforcement and Investigation Unit, iya ginpahayag nga istrikto nila nga ginapatuman ang pagsulundan sa Loading and Unloading areas agud nga maanad ang mga pedestrians kun diin ang mahimo agyan.
Suno naman kay Traffic Aide Noel Casas, kalabanan sang ila gina-sita amo ang mga naga-obstruct sa dalanon ukon naga-parking sang iligal, mga driver nga wala sang helmet, kag mga tricycle nga nagabyahe sa lugar apisar isa ini ka national highway.
Wala man nakaluwas ang mga pribado nga motorsiklo nga wala sang prangkisa apang padayon nga nagapasakay sang pasahero.
Suno kay Traffic Aide Abraham Loja, may penalidad ang driver nga naga-maneho sang amo nga mga tricycle kag nagalab-ot ini sa P1,000.
Maga-bayad man ang driver sang pampasahero nga tricycle sang P500 kun padayon ini nga naga-agi sa national highway.
Lakip sa na-isyuhan sang ticket kaina sang aga amo ang mga tricycle nagikan sa Oton, City Proper, kag Villa Anita.
Nahibaluan nga pagkatapos pa sang Dinagyang Festival 2020 maga-umpisa sa pagpangdakop ang Public Safety and Transportation and Management Office (PSTMO) kag composite team apang sa subong, ila lang anay gin-istriktuhan ang pagpangsaway sa mga nagalapas sa traffic rules and regulations.
