ILOILO CITY – Nagalaum si Iloilo City Mayor Jerry Treñas nga indi na masulit pa ang natabo nga twin shooting incident ilabi na sa kasagsagan sang Dinagyang Festival 2020.
Sa interview sang Bombo Radyo kay Treñas, iya ginpahayag nga ginkakibot niya ang natabo sang Domingo, Enero 19, sa diin patay gid ang duha ka lalaki sa separado nga pagpangluthang sa syudad.
Patay si Alian Muller alyas Kano, 42, sa Brgy. Cuartero, Jaro, kag suno sa kapulisan, ginasundan nga anggulo ang kaangtanan sini sa iligal nga droga.
Patay man si Delfin Britanico, 37 anyos, matapos nga ginluthang sa dalan sa Brgy. Nabitasan, La Paz, kag una nga ginsundan sang kapulisan ang anggulo sang road rage apang sang ulihi, ginapahayag nga posible nga naangot sa negosyo ang motibo sa pagpatay sa biktima.
Kaangot diri, ginmandu ni Treñas kay Iloilo City Police Office (ICPO) Director Pol. Col. nga padalman pa ang nagluntad nga twin shooting incident.
May directive man ang alkalde kay Public Safety and Transportation Management Office (PSTMO) Head Mr. Jeck Conlu nga gamiton anay ang mobile patrols kag mga motorsiklo sang Iloilo City Government sa paglibot-libot sa syudad agud labi pa nga mangin hugot ang seguridad.
