ILOILO CITY – Para sa ‘common good’ ukon kaayuhan sang tanan ang pag-implementar sang Traffic Discipline Zone sa Sen. Benigno Aquino Jr. Avenue, Mandurriao, Iloilo City kag indi lang eksklusibo nga ginlunsyar para magpahapos ang bahin sang gobyerno.
Ini ang pahayag ni Public Safety and Transportation Managenement Office (PSTMO)Head Jeck Conlu matapos nga nakabaton sang asud-asud nga reklamo pila ka adlaw pa lang matapos nga gin-umpisahan ang nasambit nga programa.
Nagpalab-ot sang mga reklamo ang mga pasahero nga tuman ka layo ang ila lakton agud lamang nga makapanaog kag makasakay.
Ginapahayag man nga nagatalang-talang ang kalabanan nga jeepney drivers kag pasahero kag kun kaisa, nagaresulta ini sa mga bayolasyon.
Sa interview sang Bombo Radyo kay Conlu, iya ginpahayag nga ginalauman na nila sang una pa ang amo nga mga reklamo, ilabi na bangud ginakabig na nga batasan sang kalabanan nga tawo nga magreklamo sa tion nga indi magpabor sa ila ang anuman nga sirkumstansya.
Sa bahin sang mga Loading kag Unloading Areas, ginpahayag ni Conlu nga ini ang design sang Department of Public Works and Highways (DPWH) kag ginasunod gid lamang subong.
Suno sa opisyal, indi man mahimo nga ‘door to door’ lang ang padayon nga tumanon sang tawo nga kun diin sila komportable, amo lang ang sila sundon.
Disiplina na ang kinahanglan suno kay Conlu kag dugang pa niya, ang PSTMO bilang lead agency kag ang Iloilo City Government ang nagahingyo sa publiko nga tumanon ang mga pagsulundan bangud ‘continuing process’ ini kag kun may makita nga mga dapat pauswagon, handa man ang pamunuan nga mag-adjust.
