ILOILO CITY – Linibo ang nagdagsa sa syudad sang Iloilo agud nga magsaksi sang ginapabugal nga 360 degrees performance sang walo ka tribu nga nagpakigbahin sa Dinagyang Tribes competition.
Ginpangunahan ni Iloilo City Mayor Jerry Treñas ang pag-umpisa sang Dinagyang 360 degrees performance sa highlight sang Dinagyang Festival 2020.
Antes pa man nag-umpisa ang performance sang mga tribu, may yara sang misa nga ginpatigayon sa San Jose Parish Placer nga ginpamunu-an ni Fr. Raymundo Edsel Alcayaga.
Pagkatapos sang misa, nag-umpisa gilayon ang programa sa Iloilo Freedom Grandstand kun sa diin naghatag sang mensahe sanday Iloilo Festivals Foundation Inc. President Atty. Joebert Peñaflorida, Iloilo City Mayor Jerry Treñas, Iloilo City Lone District Rep. Juliene “Jam-Jam” Baronda, Iloilo Gov. Arthur Defensor Jr. kag Ilonggo Senator Franklin Drilon.
Gilayon ini nga ginsundan sang pag-anunsyo ni Mayor Treñas nga opisyal na nga nagbukas ang Dinagyang 360 degrees.
Una nga nag perform sa Iloilo Freedom Grandstand ang Tribu Panayanon sang Iloilo City National High School kag ginsundan sang Tribu Baybayanon sang Melchor Nava National High School, special performance sang Hubon Mangunguma sang Maggahan Festival sang Guimaras, Tribu Ilonganon sang Jalandoni Memorial National High School, Tribu Salognon sang Jaro National High School.
Naghatag man sang mensahe ang common law wife ni Presidente Rodrigo Duterte nga si Madame Honeylet Avanceña nga nagserbe nga Guest of Honor kag ginsundan sang special performance sang Arevalo Elementary School nga defending champion sa Tambor Trumpa Matsa Musika ukon drum and lyre competition.
Masunod nga nagpasundayag ang Tribu Hugponganon sang Tiu Cho Teg Ana Ros Integrated School, Tribu Baryohanon sang Bo. Obrero National High School, Tribu Paghidaet sang La Paz National High School, Parada sang Miss Iloilo 2020 Queens kag Tribu Dagatnon sang Ramon Avanceña National High School.
