ILOILO CITY – Gindayaw sang Iloilo Provincial Government ang Response Team ukon responders nga aktibo gid sa pagbulig sa mga nalipong nga performers sa highlight sang Dinagyang Festival 2020 sang Domingo, Enero 26.
Sa interview sang Bombo Radyo kay Provincial Administrator Atty. Suzette Mamon, iya ginpahayag nga dalayawon ang pagpanikasog sang amo nga grupo kag wala nila ginbayaan ang ila responsibilidad.
Suno kay Mamon, ginabanta nga yara sa 15 ka tawo ang nalipong sa Solis-Valeria Stage sang Domingo.
Ang Solis-Valeria stage ang napaidalom sa pagdumalahan sang Iloilo Provincial Government.
Magluwas diri, ginpahayag ni Mamon nga smooth-sailing ang nangin dalagan sang mga performance sa amo nga stage.
Apang nagalaum lang ang natungdan nga kun mahimo, mas daku kag mas malapad na nga entablado ang makit-an sa masunod nga tuig.
Ginpalab-ot man ni Mamon ang iya pagpanginbulahan sa kadalag-an sang Dinagyang Festival 2020, ilabi na sa Tribu Paghidaet nga amo ang nangin kampyeon sa Ati-Tribe 360-degree performance.
