ILOILO CITY –Naglab-ot sa 24 ka mga long and short fire arms ang ginpaidalom sa demilitarization sang 6th Forward Support Unit sang Philippine Army.
Sa interview sang Bombo Radyo kay Lt Col Imelda Nadala, commanding officer sang 6th Forward Support Unit sang Philippine Army, iya ginpahayag nga ini nga mga armas ang gin-surrender kag ang iban ang na-confiscate kag nadakpan.
Magluwas sa 24 ka mga gin-demilitarize, may yara sang pulo nga i-turn-over sa supply unit kag pulo pa gid nga i-verify pa sa Philippine National Police Crime Laboratory agud ma identify kun sa diin nga law enforcement agency nakuha ang ini nga mga pusil.
Samtang, suno naman kay Capt Cenon Pancito III, ang spokesperson sang 3rd infantry Division sang Philippine Army, ang demilitarization ang ginahimo agud nga indi na magkadto sa rebelde ang mga armas nga magatuga sang threat sa mga pumuluyo.
Sa subong nga tuig, ini ang pinakauna nga ginhimo nga demilitarization apang humalin sang una, madamo naman ang ginhiwat sang Philippine Army kaangay sa ginpatigayon sa headquarters sang 3rd Infantry Division nga ginpamunuan ni Presidente Rodrigo Duterte.
