ILOILO CITY – Gin-abisuhan ni Local Economic Enterprise Office (LEEO) Head Mr. Ariel Castañeda ang mga pinuno sang mga merkado nga labi pa nga hugton ang inspection sa mga karne kag pagkaon nga nagasulod sa mga balaligyaan sa syudad sang Iloilo agud masiguro kon diin ini naghalin.
Ini agud mapat-od nga ang source sang mga karne sang baboy kag iban pa nga pagkaon ang indi kontaminado sang African Swine Fever (ASF) kag labi na, mapahilayo ang mga pumuluyo sa ginakakulbaan nga 2019 novel coronavirus.
Sa interview sang Bombo Radyo kay Castañeda, iya ginpahayag nga doble ang pagpanikasog sang mga inspectors sa subong agud mapat-od nga matinlo ang mga pagkaon sa merkado, malls, kag pati na sa mga talipapa.
Ginpasalig man sang natungdan nga magapadayon ang monitoring sang pamunuan sa ila area of jurisdiction kag maga-obserba sang precautionary measures para sa seguridad sang tanan.
