ILOILO CITY – Padayon ang close monitoring kag pagpakig-angot sang Iloilo City Health Office sa Department of Health (DOH) agud maabisuhan ang publiko kaangot sa Novel Coronavirus ukon 2019 nCOV.
Sa interview sang Bombo Radyo kay Dr. Roland Jay Fortuna sang City Health Office kag focal person for Novel Coronavirus, iya ginpahayag nga sa subong, ang hugot nga panugyan sa mga pumuluyo amo nga mag-aligmat kag sundon ang proper hygiene.
Kaangot sa kakulang sang face masks sa mga pharmacy, ginpahayag ni Fortuna nga kahapon, nagpatigayon sang inventory ang City Health Office agud maisip kun pila na lang ang supply sang face masks nga mahimo ipanagtag sa mga pasyente sa district health centers.
Suno sa natungdan, indi man sakop sang City Health Office ang pagmandu sa mga pharmacy nga i-regulate ang pagbaligya sang binulto nga face masks bangud trabaho ini sang Department of Trade and Industry.
Sa tion nga wala na sang face masks nga mahimo mabakal, ginpahayag ni Fortuna nga mas maayo nga magbinuligay ang tanan sa pagtapna sang nasambit nga balati-an.
Sa bahin sang Iloilo City Hall, ginahingyo ang mga empleyado nga mag-disinfect gamit ang alcolol bag-o kag pagkatapos mag-gamit sang biometrics.
Nagalaum si Fortuna nga may kasubong man nga tikang ang iban pa nga establisyemento.
