ILOILO – Wala sang na-monitor nga organisado nga shabu laboratory sa Pilipinas apang may yara sang nadiskubrehan nga condominium unit nga naga-manufacture sang shabu sa diin wala sang baho nga ma-detect.
Ini ang pahayag ni Iloilo Provincial Police Office (IPPO) Director Pol Col Roland Vilela kadungan sa iya ginpresentar nga mga accomplishment sang pamunuan.
Suno sa director, ang nasambit nga high-technology shabu laboratory ang ginakabig nga isa ka ‘break through’ sa illegal drug operation sa pungsod.
Samtang, suno kay Vilela, base sa mga nakumpiska sa mga buybust operation sa iban nga bahin sang Batanes, Quezon, Masbate, kag Alabang, makita nga pareho ang bulto sang droga nga nakumpiska sa probinsya sang Iloilo.
Ginalantaw sang kapulisan ang posibilidad nga isa lang ang ginhalinan sang mga items.
Kaangot diri, bangud sa hugot nga pagbantay sang Bureau of Customs, isa sa nangin paagi sang dorogista sa pagbyahe sang iligal nga droga amo ang paghulog sini sa dagat kag pagbutang sang Global Positioning System ukon GPS agud ila man nga mabutong halin sa kalalawran.
Nahibaluan nga ang presentasyon sang IPPO ang ginpatigayon matapos nga nakumpiska ang ginabanta P6.3 million nga balor sang iligal nga droga sa Barangay Ungka 2, Pavia, Iloilo sang Domingo kag ginabanta P1.2 million nga balor sang droga sa Barangay Calaparan, Arevalo, Iloilo City.
‘A VERY BIG FISH.’
Gindayaw naman sang Police Regional Office (PRO) VI ang kadalag-an sang kapulisan nga makumpiska ang kapin P7.5 million nga balor sang iligal nga droga subong nga semana.
Suno kay PRO6 VI Director PBGEn Rene Pamuspusan, padayon ang monitoring sa mga high value individuals (HVI) kag regular man ang submission sa national headquarters.
Ang national headquarters na ang naga-verify kag nagakumpirma kun bala makabig nga HVI ang mga pangalan nga ginasumite sang mga intel personnel sa rehiyon.
Kaangot sa kaso sang Domingo sa diin ginabanta kapin P6.3 million ang nakumpiska sa Pavia, Iloilo kag ginabanta 1.2 M nga balor sang droga ang nakuha sa Arevalo, Iloilo City, ginpahayag ni Pamuspusan nga padayon man ang pagmonitor sa iban pa nga mga kaangot nga persona bangud nadala sa lista sang high value individuals si Jovan Abantao.
Suno sa opisyal, masami nga ang mga nadakpan nga mga distributor ang ginagamit sang mga dalagko nga drug personalities kag subong nga nadakpan sila, mahimo nga maislan sila sang bag-o nga mga tinawo.
‘SA MGA KABATAAN.’
Samtang, ginahingyo naman ni Pamuspusan sa mga pamatan-on nga tun-an sang maayo ang ila mga gina-obra.
Ini ang kaangot sa gihapon sa pagkalakip sang iban nga mga kabataan sa baligyaanay sang droga.
Suno sa opisyal, ginagamit lang sang mga dalagku nga dorogista ang mga pamatan-on sa diin nagalab-ot lang sa duha ka libo ang mahatag sa mga kabataan samtang minilyon naman ang mabaton sang mga dalagku nga personalidad.
Dugang pa ni Pamuspusan, sa tion nga madakpan ang mga kabataan, sigurado man nga islan na sila bilang mga tinawo kag indi sila pagbuligan sang ila mga amo.
