ILOILO – Nagpapanaug sang mandu ang National Museum nga ‘i-cease and desist’ ukon ipauntat na ang pagpatigayon sang treasure hunting sa Brgy. Pasong, Igbaras, Iloilo.
Ini matapos nga nagsulat na ang mga opisyal sang local government unit sang Igbaras, Iloilo sa pagpanguna ni Mayor James Esmeralda sa amo nga pamunuan kasunod sang kahangawa sang publiko sa mahimo nga negatibo nga epekto sang mano-mano nga treasure hunting nga ginapatigayon.
Nahibaluan nga una na nga nagdangop si Esmeralda sa Iloilo Provincial government, sa diin ginpahayag niya nga naglawig na sang isa ka tuig kag tunga ang treasure hunting kag may posibilidad nga matiphag ang lugar bangud kun padayon nga ginakutkot, nagahumok ang base sang duta kag ginakahangaw-an nga madagdag ang siyam ka mga balay nga yara sa palibot sang lugar.
Sa interview sang Bombo Radyo kay Esmeralda, iya ginpahayag nga yara na sa 60 ka tapak ang kadalumon sang nakutkot kag 1000 quare meters ang kalaparon.
Suno pa kay Esmeralda, wala makakuha sang permit sa barangay, municipal kag provincial government ang nag-operate sang treasure hunting.
Ang permit nga ginauyatan sang korporasyon ang gikan sa National Museum nga naga pahanugot sa ila nga maghiwat sang aktibidad.
Samtang, amo man nga kahangawa ang ginapakigbahin sang mga pumuluyo sa ila punong barangay.
Suno kay Punong Barangay Cornelio Ilumba Jr., nakulbaan ang mga tawo nga masulit ang natabo nga landslide sang 2013.
Suno sa natungdan, makapila ka beses nga naninguha siya nga istoryahon ang nagadumala sa treasure hunting apang naga-inisister ang treasure hunters nga sigihon nila ang ila aktibidad.
Samtang, santu sa mandu nga ginpapanaug sang opisina sang National Museum, illegal ang ginahimo nga pagkutkot sang lupa.
Nadiskubrehan man nga ginpeke sang mga treasure hunters ang dokumento nga ila ginakaptan bangud ang papeles ang orihinal nga gin-isyu ang para sa isa ka treasure hunting activity sa Nueva Ecija.
Lauman nga igatsekyar nanday Esmeralda kag sang mga kaupod sini ang lugar subong nga semana agud mapat-od nga nakahalin na ang mga treasure hunters.
