ILOILO CITY – Madugay na nga ginkabig bilang persona-non-grata sa ila barangay ang lalaki nga nadakpan sa ginpatigayon nga drug buybust operation sang Regional Drug Enforcement Unit (RDEU) sa Sto. Niño Norte, Arevalo, Iloilo City kahapon, Pebrero 4.
Ang ginpahayag nga drug pusher kag buyer amo si John Rodman Domanillo, isa ka fish vendor, kag residente sang Brgy. Rizal Pala-pala 2, Iloilo City Proper.
Sa interview sang Bombo Radyo kay Punong Barangay Noel Soliman, iya ginpahayag nga may daan na nga kaso sang pagpangawat ang lalaki.
Suno sa natungdan, sang nakaistoryanahay sila ni Domanillo sadto, hugot gid sini nga ginapanginwala nga may kaangtanan ini sa iligal nga droga.
Suno sa opisyal, wala siya sang kumpiyansa sa lalaki amo nga ginmanduan niya ang mga barangay tanod nga paggwaon si Domanillo sa tion nga makit-an siya sa barangay.
Nahibaluan nga madugay na nga ginamonitor sang kapulisan si Domanillo.
Kahapon, nakuha sa iya possession ang P1,200 nga buy bust money kag duha ka sachet sang ginapahayag ilegal nga droga.
