ILOILO CITY – Usisaon sang pila ka mga barangay sa syudad sang Iloilo ang mga talipapa sa ila lugar agud matsekyar kun nakaagi sa slaughterhouse ang mga karne sang baboy nga ginabaligya.
Ini matapos nga sa ginpatigayon nga committee hearing kaina sang aga, ginpaintindi sa mga opisyal sang barangay nga sa tion nga nakaagi sa slaughterhouse ang mga karne, may yara ini sang meat inspection certificate.
Sa interview sang Bombo Radyo kay Iloilo City Councilor Ely Estante, chairman sang Committee on Market and Slaughterhouse, iya ginpahayag nga ginpaathag man sa mga opisyal nga ang amo nga lihok ang magapat-od nga indi maglapta ang mga sakit kaangay sang novel coronavirus nga mahimo dal-on sang indi matinlo nga mga karne.
Dugang pa ni Estante, gin-istoryahan man sa amo nga committee hearing ang pag-regulate sang mga talipapa agud masigurado ang ‘cleanliness, sanitation, and arrangement’.
Ginkalipay man sang natungdan nga wala sang negatibo nga reaksyon ang mga tag-iya sang talipapa kag sa pagkamatuod, naghatag pa ang mga ini sang ila nga rekomendasyon.
Suno kay Estante, kapin 50 ang mga nagtambong kag ang mga wala nakatambong amo ang mga talipapa nagikan sa Caingin, La Paz; Baldoza, La Paz; Quintin Salas, Jaro; kag MH del Pilar, Jaro, Iloilo City.
