ILOILO CITY – Labi pa nga ginahugot sang Iloilo City Government ang mga lihok nga ginapatigayon agud mapahilayo sa Novel Coronavirus Acute Respiratory Syndrome ang mga pumuluyo sa syudad.
Sa interview sang Bombo Radyo kay Iloilo City Mayor Jerry Treñas, iya ginpahayag nga nagsulat na siya sa tatlo ka airline companies agud boluntaryo nga isuspinde sang mga ini ang tanan nga international flights padulong sa mga pungsod sa diin may positibo nga kaso sang novel coronavirus.
Ini nga mga airline companies amo ang Philippine Air Asia, Philippine Airlines, kag Cebu Pacific Air.
Suno kay Treñas, dapat gid nga temporaryo nga kanselahon ang mga byahe bangud nagapati sya nga kun nagapadayon ang pagsulod sang mga turista sa paluparan, posible nga magpadulong man ang mga ini sa syudad sang Iloilo.
Samtang, gintukod man sang Iloilo City Government ang “NCOV Taskforce” sa syudad agud makig-angot sa mga eskwelahan kag sa mga establisyemento.
Suno kay Treñas, ini ang ginahimo pagi sa pagbinuligay sang Department of Interior and Local Government, Department of Health, kag City Health Office.
Kaangot diri, ginhingyo ni Treñas sa Department of Health nga kun mahimo, magbutang ukon maghanda na sang isolation room sa syudad agud pahamtangan sang mga PUIs ukon persons under investigation.
Dugang pa sang natungdan, indi maayo nga gamiton ang La Paz Maternity Building bangud indi man ini ospital kag wala sang nagakaigu nga kagamitan.
Nahibaluan nga sang tion nga nagtimbuok ang kaso sang dengue sa syudad, gingamit man ang La Paz Maternity Building apang nagpanghulam pa sang folding beds sa Philippine Army.
May yara man sang ginbakal ang Iloilo City Government nga 78 ka mga non-contact thermometers agud mapagamit sa Iloilo City Hall kag sa mga barangay.
Suno kay Treñas, ihatag sa barangay health worker ang amo nga non-contact thermometer kag unahon gid tsekyar ang mga tawo nga may travel history sa mga lugar sa diin may yara na sang nagpositibo sa novel coronavirus.
Sa tion nga may yara sang tawo nga makit-an nga may sintomas sang amo nga virus, dapat nga makig-angot gilayon ang barangay health worker sa City Health Office agud nga ma-classify sang pamunuan kun ini bala ang person under investigation ukon person under monitoring.
