ILOILO CITY – Ginakabig ni Liga ng mga Barangay President Irene Ong nga political harassment ang pagpasaka sang kaso nanday anay Iloilo City Councilor Joshua Alim kag Plaridel Nava batok sa mga opisyal nga kaalyado ni Iloilo City Mayor Jerry Treñas.
Ini ang reaksyon ni Ong kasunod sang pagkumpirma ni Alim nga nagpatigayon sang hearing ang Department of Interior and Local Government para sa preliminary conference kag formal investigation sa kontrobersyal nga pagdeklarar sang state of calamity sa syudad sang Iloilo sa idalom sang administrasyon ni anay Mayor Jose Espinosa III.
Sa interview sang Bombo Radyo kay Ong, iya ginpahayag nga indi siya magsapak ukon maghatag sang pahayag tuhoy sa isyu.
Suno kay Ong, ipaagi niya sa legal nga proseso ang tanan agud nga indi na maglala ang kontrobersiya.
Nahibalu-an nga si Ong, ang isa sa mga elected official sa Iloilo City Council nga absent sa sesyon kun sa diin natigayon nga maaprobahan ang pagdeklarar sang state of calamity bangud sa epekto sang El Niño sa syudad sang Iloilo sang nakaligad nga tuig.
Matandaan nga santo sa nangin paathag ni Ong, naglain ang iya pamatyag rason nga wala na niya ginpatapos ang sesyon.
Magluwas kay Ong, lakip man sa mga absent amo sanday Vice Mayor Jeffrey Ganzon, Iloilo City Councilor Love-Love Baronda, Ely Estante, Armand Parcon, Jay Trenas kag SK Federation President Leila Luntao samtang naka-leave naman si Iloilo City Councilor Mandrie Malabor.
Bangud sini, gin-akusaran nga ang nasambit nga deklarasyon ang natigayon apisar nga wala sang quorum.
