ILOILO – Indi tuman kalala ang epekto sang Novel Coronavirus ukon COVID-19 sa iban nga syudad sa China kaangay sang Shanghai kag Beijing ipaanggid sa epekto sini sa epicenter nga Wuhan, Hubei, China.
Sa exclusive interview sang Bombo Radyo kay Frank Chao, isa ka Chinese journalist nagikan sa Shanghai, iya ginpahayag nga gamay lang ang apektado sa ila syudad sa kasagsagan sang novel coronavirus scare.
Santo sa pinakaulihi nga report sang World Health Organization, naglab-ot na sa masobra 42,600 ang kumpirmado nga positibo nga kaso sa bug-os nga China, kag naglab-ot na sa 1,016 ang patay.
Sa sini nga numero, suno kay Chao, masobra 300 ka kaso ang nagikan sa Shanghai, kag isa ang patay.
Suno pa sa natungdan, bilang isa sa pinakadaku nga syudad nga may 24 million nga populasyon, indi pa makabig nga ‘seryoso’ ang epekto sang novel coronavirus sa ila lugar.
Wala man sang kakulangan sa pagkaon ukon anuman nga resources sa subong.
Apisar sini, talalupangdon suno sa natungdan ang pagkansela ang pila ka mga trabaho kag sang mga klase.
Wala man nagatinir sa gwa ang mga tawo kag bangud sini kag sa travel bans nga ginpatuman sang iban nga mga pungsod, apektado ang turismo sang lugar.
MGA LIHOK.
Apisar sini, wala naga-pakampante ang gobyerno kag may ginapatigayon ini nga mga lihok.
Suno kay Chao, bangud madamo ang mga tawo gikan sa spring festival ang nagapauli na sa ila mga balay, may mga ginapatigayon nga inspection sa tagsa ka terminal sa salakyan.
Ini agud mapat-od ang body temprature sang mga tawo.
Sa Shanghai, suno kay Chao, may on-standby man nga mga personnel sa mga residential compounds agud nga mag-tsekyar sang mga naga-guwa kag nagasulod nga mga tawo kag bisita.
PAGBINULIGAY.
Sa Wuhan City, Hubei Province naman, suno sa natungdan, tuman man ka seryoso ang local government sa pagtapna sang balatian.
Napaidalom sa quarantine ang lugar halin sang Enero 23.
Nagapadayon man ang pagtukod sang duha ka ospital kag pagpahamtang sang dugang nga 2,000 beds para sa ‘serious and severe cases’.
May mga exhibition centers, gyms, hotels, kag eskwelahan naman para sa mga tawo nga indi pa tuman ka seryoso ang ginabatyag nga sintomas.
Dugang pa sang natungdan, may yara man sang masobra 10,000 ka mga doctors kag nurses nagikan sa nanuhay-tuhay nga bahin sang China ang nagpadulong sa Wuhan agud magbulig sa pagbulong sa mga pasyente.
