ILOILO – Nagpasalamat si Iloilo Police Provincial Office Director Pol. Col. Roland Vilela sa probinsya sang Iloilo sa oportunidad nga ginhatag sa iya nga pamunuan ang kapulisan sa bilog nga probinsya.
Suno kay Vilela, luyag pa kuntani niya nga palawigon ang iya termino sa probinsya bangud may ‘misyon’ pa siya nga wala natapos apang may nakadesignar na nga bag-o nga posisyon para sa iya.
Subong nga Mierkules, magapungko na si Police Colonel Paul Kenneth Lucas bilang Officer In-Charge sang Iloilo Police Provincial Office.
Si Vilela naman ang magapadulong sa Estados Unidos agud mangin police attache sa sulod sang tatlo ka tuig.
Nagpangayo man si Vilela sang pasaylo sa mga pumuluyo kag opisyal nga mahimo naglain ang buot sa iya ukon wala niya nasapak.
Suno kay Vilela, ang mga naakigan naman niya ang bangud lang sa trabaho kag wala sang personal nga rason.
Suno sa opisyal, dapat nga magpangibabaw ang diplomasiya kag disiplina sa trabaho ilabi na gid sa posiyon bilang lider sang kapulisan sa probinsya sang Iloilo.
