ILOILO – Ginkadlawan lang ni Police Regional Office (PRO) 6 Director PBGen Rene Pamuspusan ang balita nga nag-gwa nga nagapahayag nga yara sa ‘notorious drug list’ ni Presidente Rodridgo Duterte si Police Lieutenant Colonel Jovie Espenido.
Ini matapos nga gin-report sang online news website nga Rappler subong nga adlaw, Pebrero 12, nga duha ka wala ginhingadlan nga police general ang nagkumpirma sang amo nga impormasyon.
Sa exclusive interview sang Bombo Radyo kay Pamuspusan, iya ginpahayag nga sang tion nga nadesignar si Espenido sa Bacolod City kag napaidalom sa otoridad sang PRO 6, nangin ‘all-out’ ini sa kampanya batok sa iligal nga droga.
Dugang pa sang natungdan, bilang Deputy City Director for Operations sang Bacolod City Police Office (BCPO) kag pinuno sang Bacolod City Drug Enforcement Unit, hugot ang ‘KAMPANYA’ ni Espenido batok sa operasyon sang iligal nga droga, kag indi ang ‘INVOLVEMENT’ sini sa amo nga aktibidad.
Suno kay Pamuspusan, wala siya personal nga nagapati sa amo nga balita ilabi na bangud wala man sang ngalan ang duha ka police general nga ginatumod sang Rappler.
Ang Camp Crame ukon Philippine National Police (PNP) national headquarters lang suno sa iya ang nakahibalo sang lista sang mga personnel nga yara sa drug list sang presidente.
Nahibaluan nga si Espenido ang isa sa pinakilala nga opisyal sa pungsod nga ‘poster boys’ ukon ginasaligan ni Duterte sa iya war-on-drugs campaign.
Siya ang nagpanguna sa operasyon sang kapulisan nga nangin kabangdanan sang kamatayon ni Ozamiz City Mayor Reynaldo Parojinog kag 14 ka iban pa.
Siya man ang pinuno sang Albuera town police sang napatay sang kapulisan ang alkalde sang banwa nga si Rolando Espinosa.
Nahibaluan man nga sang nagligad nga semana, liwat nga nangin kontrobersyal ang ngalan ni Espenido matapos nag-abot ang relief order nga napetsahan Pebrero 5 kag siya ang gin-relieve sa iya pwesto sa BCPO sang Pebrero 9.
Tubtob subong, wala pa sang pahayag ang PRO-6 kun ngaa nga gin-transfer sa office of the chief of the PNP si Espenido.
