ILOILO CITY – Ginpasalig sang Police Regional Office 6 nga indi nila pagpabay-an ang pamilya ni Police Captain Efren Espanto Jr., pinuno sang reconnaisance company sang Regional Mobile Force Batallion nga napatay sa engkwentro batok sa mga miyembro sang New People’s Army sa Brgy. Aglobong, Janiuay, Iloilo sang Mierkules, Pebrero 12.
Sa interview sang Bombo Radyo kay Pol. Lt. Col. Joem Malong, iya ginpahayag nga may yara sang lauman nga financial assistance nagikan sa Philippine National Police, National Police Commission, kag iban pa nga ahensya.
Suno kay Malong, apisar indi mabayluhan sang kwarta ang kabuhi ni Espanto, ini ang kabahin man sang mga lihok nga ginapatigayon sang kapulisan agud indi mabutang sa alang-alang ang kabataan kag asawa ni Espanto.
Magluwas diri, karon sa hapon, naka-schedule nga maga-abot si Philippine National Police Chief Police General Archie Gamboa agud maghatag sang Posthumous Award kay Espanto.
Pahayag ni Malong, ‘deserving’ si Espanto sa amo nga pagpasidungog kag siya ang ginakabig na nga ‘hero’ ukon baganihan sang Western Visayas.
Magluwas sa paghatag sag financial award kag Posthumous Award, lauman nga nga makigsapol si Gamboa sa pamilya ni Espanto bilang pagpakig-unong sa nalisdan.
Samtang, sa Domingo, natalana nga pagadal-on sa La Carlota City, Negros Occidental ang bangkay ni Espanto.
Suno kay Malong, ginahulat na lang sa subong ang autopsy examination results nga isa man sa mga kinahanglanon agud ma-transfer ang iya bangkay.
Sa subong, suno kay Malong, may yara na sang personnel ang Police Regional Office 6 nga amo ang nagaproseso sa pagpatigayon nga makapauli ng bangkay ni Espanto sa iya hometwon.
Kun posible suno kay Malong, ikarga sa fast craft, takna ‘las otso sa Domingo sang aga, si Espanto.
