ILOILO CITY – Dapat nga iselebrar sang mga kabataan ang Valentine’s Day nga wala nagapakighilawas.
Ini ang panugyan ni Iloilo City Councilor Allan Zaldivar, chairman sang Committee on Health sang Iloilo City Council.
Sa interview sang Bombo Radyo kay Zaldivar, iya ginpahayag nga ang premarital sex ang masami nga ginahimo sa Valentine’s Day ilabi na sang mga magkarelasyon nga luyag magpakita sang tuman nga paghigugma sa isa kag isa.
Pahayag pa sang opisyal, talalupangdon nga madali mahaylo ang mga menor sa subong, ukon sa termino sang kadam-an, ‘marupok’ ang mga kabataan bangud sa impluwensya sang barkada, teknolohiya, kag pressure nga mabatyagan gikan sa mga katubo-tubo.
Pahayag sang natungdan, dapat nga panumdumon sang mga kabataan nga para lamang sa mag-asawa ang amo nga aktibidad.
Dugang pa ni Zaldivar, indi kinahanglan nga magdali bangud maabot gid ang husto nga tion.
Iya man ginpahanumdom sa publiko nga dapat hatagan sang balor sang ka-sagrado sang kasal, pagpakighilawas, kag moral values.
