ILOILO – Ginaduso ni Iloilo 2nd District Board Member Rolito Cajilig nga temporaryo nga ipauntat ang quarry operation sa Dumangas, Iloilo.
Sa interview sang Bombo Radyo kay Cajilig, iya ginpahayag nga mas makapaayo nga ang Provincial Environment and Natural Resources Office na ang magpalab-ot kay Gov. Arthur Defensor Jr. tuhoy sa nasambit nga plano.
Suno kay Cajilig, may yara sang isa gid lamang ka lisensyado nga quarry operator sa Dumangas samtang ang iban ang may yara sang expired nga permit.
Kun nagapadayon ang quarry operation sa nasambit nga banwa, kun tani, may yara sang nabaton nga share ang Barangay Council kag ang Local Government Unit.
Ginpahayag ni Cajilig nga mas maayo man nga hibaluon gid mismo kun sin-o ang mga nagapanag-iya sang batil nga amo ang ginakargahan sang mga materyales halin sa Iloilo padulong sa Buenavista, Guimaras.
Kanugon lang suno sa natungdan ang mga rekomendasyon kun wala sang aktu nga patigayunon.
