ILOILO CITY- Nagalaum ang MORE Electric and Power Corporation nga makahatag sang pagbag-o nga ginalauman sang mga pumuluyo sang syudad sang Iloilo kun serbisyo sa kuryente ang pagahambalan.
Sa interview sang Bombo Radyo kay Roel Castro, Presidente kag Chief executive Office sang MORE, iya ginpahayag nga subong nga adlaw, maga-umpisa na sila batun sang mga applicants sang linya sang kuryente.
Suno kay Castro, sa tion nga nakabayad na sa Panay Electric Company para sa connection sang kuryente, magpadulong lang sa talatapan sang MORE Electric and Power Corporation, kag dal-on ang resibo para sa bag-o nga electric connection kag kumpletuhon lang ang pila ka mga requirements.
Pahayag pa ni Castro, ila ginapasiguro ang mas maayo nga serbisyo nga luyag sang mga pumuluyo.
Dugang pa sang natungdan, nagapangayo siya sang pasaylo bangud indi tuman ka kumportable sa subong ang ila talatapan, apang iya ginpasigurado nga bukas sila sa paghatag sang nagakaigo nga serbisyo, sabat sa mga palamangkutanon sang mga konsomidor.
