ILOILO CITY– Nakapatigayun sang coordination sa Philippine Drug Enforcement Agency ang katapo sang Regional Drug Enforcement Unit sang nagpatigayun sang buy bust operation nga nangin kontrobersyal bangud sa ginapahayag abduction.
Sa interview sang Bombo Radyo kay Shey Tanaleon, tagpamaba sang Philippine Drug Enforcement Agency 6, iya ginpahayag nga 6:30 sang kasisidmon sang Marso 3 sang nagpakig-angot ang Regional Drug Enforcement Unit bilang kabahin sang standard operating procedures sa pagpatigayun sang drug operation.
Suno kay Tanaleon, pagkatapos sang operation, ginpasa sa ila ang detalye nga amo naman ang ila basehan sa paghimo sang report.
Ginpahayag ni Tanaleon nga wala sila nakaupod sa nasambit nga drug operation kag kun may yara man sang ginapahayag abduction, ini ang sabton sang unit nga nagpatigayon sang buy bust operation.
