SAN JOAQUIN, ILOILO– Indi matuod ang nagalagaw nga istorya nga ipaidalom sa lockdown ang banwa sang San Joaquin bangud may nagpositibo sa coronavirus disease 2019 sa banwa sang Miagao.
Sa interview sang Bombo Radyo kay Iloilo Board Member , kag San Joaquin incident commander Valentin Serag, iya ginpahayag nga may yara lang sang ginpatuman nga border restriction sa nasambit nga banwa.
Suno kay Serag, nagapangabay lang sila nga kun wala sang importante nga kadtuan sa banwa sang San Joaquin, likawan lang ang pagpadulong didto.
Pahayag pa ni Serag, mahimo makasulod sa ila banwa kun may yara ka sang enhanced community quarantine pass apang ginadumilian ang pagpadulong sa nasambit nga banwa kun indi importante ang pagahimuon nga transaksyon.
Indi naman mahimo nga makabyahe suno kay Serag ang mga public utility vehicles kaangay sang mga tricycle,jeep kag mga habal-habal, bangud kun damo ang nagabyahe nga salakyan, madamo man ang mga tawo ang magagwa sa ila tagsa ka mga puluy-an.
Nahibaluan nga ang banwa sang San Joaquin ang may yara sang 214 ka mga persons under monitoring, 141 ang naka kumpleto home quarantine, kag 107 ang yara sa close monitoring kag isa ka person under investigation.
Dugang pa sang natungdan, nagahingyo sila nga kuntani magkooperar ang tanan kag sundon ang ginapatuman nga physical distancing
