GUIMBAL ILOILO- Ginkalipay sang mga opisyales kag pumuluyo sang banwa sang Guimbal ang pagbawi sang deklarasyon nga persons under monitoring ang tanan nga pumuluyo sang nasambit nga banwa.
Sa interview sang Bombo Radyo Iloilo kay Guimbal Vice Mayor Jennifer Garin Colada, iya ginpahayag nga tuman ang iya kalipay bangud ginbawi na sang Department of Health ang ila deklarasyon kag madula na ang kahangawa snag mga pumuluyo.
Suno kay Colada, una na nga nakaangkon sang diskriminasyon ang mga Guimbalanon bangud i di sila pagpahanugutan nga makasulod sa iba nga banwa kag sa syudad sang Iloilo bangud man sa kahangawa sang pumuluyo sa virus.
Pahayag pa niya, hugot nga ginapatuman sa ila banwa ang enhanced community quarantine kag mas ginpahugot pa nga disinfection.
Lakip na diri suno sa natungdan ang pagrequire sa mga pumuluyo nga magsuksok sang masks antes magsulod sa merkado, ginapaagi sa thermal scanner kag dapat magpresenta sang home quarantine pass.
